शिकविलेस मजला

शिकविलेस तूं मजला
अस्फुटशा ओठांतून
गीत कसे गुंफावे
मोहकशा शब्दांतून ||१||

शिकविलेस तूं मजला
धुंद, गूढ स्पर्शांतून
गंध कसा बोलांनो
आणावा हृदयांतून ||२||

शिकविलेस रंगांतून
विश्व नवे उजळाया
अंतरीची आंच पुरी
आर्त स्वरीं ओताया ||३||

शिकविलेस अर्पाया
जीवन प्रीतीस्तव
रम्य चांदण्यात, अहा
विसराया देहभाव ! ||४||

शिकविलेस हे सारें
शिकविलें न एक तूं
जीव कसा जगवावा
तुजवांचून, तुजवांचून ! ||५||

(१९६३)