तो ना एकटा कधीही

ज्याची धरणी माऊली
आणि अंतराळ बाप
तो ना पोरका जगती
सारे विश्व त्याच्या घरी

सूर्य चंद्र तारकाही 
सदा साथ त्यास देती
अंध:कारी संकटात
मार्ग तयास दाविती

बंधु बांधव पहाड
वृक्षवेली गोतावळी
हर्षोत्सव प्रीती सदा
नांदे तयाच्या सदनी

शांती तयाच्या हृदयी
जसे उदक सागरी
वर लाटा बहु जरी
घनगंभीर अंतरी

असा संसार जयाचा
तो ना एकटा कधीही
सारी सृष्टी तयासाठी
असे सुखास कारणी

संघर्ष

सारे हवे ते पदरात आहे
सुखात आयुष्य क्रमित आहे
सगळे कसे ते सुरळित आहे
संघर्ष माझ्या रक्तात आहे

सुदृढ शरीर उत्कृष्ट आहे
व्याधी बिमारी अज्ञात आहे
चिंता कुचिंता स्वप्नात आहे
संघर्ष माझ्या रक्तात आहे

लक्ष्मी पुढे हात जोडून आहे
दुर्भाग्य दारिद्र्य अज्ञात आहे
कोणास वाटेल स्वर्गात आहे
संघर्ष माझ्या रक्तात आहे

आहे पुढे त्यास मी अंध आहे
नव्हते कधी ते पुढे लख्ख आहे
कोणी मनाला भुलवित आहे
संघर्ष माझ्या रक्तात आहे

उमला कळ्यांनो

उमला कळ्यांनो वसंत आला
शिशिर वस्त्रे फेकून टाका
पळून गेला वेडा हिवाळा
उबदार वारे अंगावरी घ्या

दडले तुम्हांत विपुल रंग
छटा अनंत एका तनुत
लज्जा सरुद्या, पडदा ढळूद्या
सौंदर्य तुमचे आम्हां दिसूद्या

लालित्य तुमचे तुमच्या वपुत
सुगंध तुमचा तुमच्या मनात
आरक्त पत्रे उमलून देह
भारून टाका समस्त लोक

सूर्यास वाटेल तुमचाच हेवा
धरतीस वाटेल अभिमान वेडा
मारुत येता हलकेच मुरडा
दाही दिशांना वसंत फुलवा

खुडता कुणीही नकोत अश्रू
चुरता कुणीही क्षमा असूद्या
नि:स्वार्थ तुमचे सुधन्य आयु
सुगुण तुमचे स्मरणी असूद्या

विचित्र दुनिया घेईल गंध
सुकून जाता निर्माल्य देह
काही क्षणांचे फुलवून आयु
पुढच्या वसंती पुन्हा तुम्ही या

प्रार्थना

एक नवीन विचार
आज मनात येऊ दे
भूतकाळाचे मळभ
दूर निघून जाऊ दे

एका विचारची शक्ती
पुरे आहे लढायला
गूढ संघर्ष मनीचा
धूम पळून जायला

नव्या विचाराची वाट
पाहते मी हररोज
आला जर कदाचित
तर स्वागत करेन

नवा विचार धरता
उद्या जुनाट होईल
नवा प्रश्न तयामुळे
मनामधे उगवेल

मग अजून वेगळा
मनी विचार येऊ दे
नव्या जुन्याचे मळभ
दूर निघून जाऊ दे