पोवाडा : कॅनडा

खालील पोवाडा "तानाजीचे वर्णन" ह्या चालीत म्हणावा.

कॅनडा देश बर्फाळ | थंडी जर्जाळ |
गोठती हातपाय | उणे वीस जाय हा जी जी जी ||१||

बर्फाची शेती महान | उत्पादन छान |
निसर्गवरदान | वस्ती अतिलहान हा जी जी जी ||२||

दहा राज्ये तीन टेरीटोरी | सुखाने नांदती |
मस्त दैनंदिनी | लाभे मन:शांती हा जी जी जी ||३||

अमेरिकन भाजीफळे खाऊ | चीनी वस्त्रे घालू |
सुरक्षित राहू | फुकट डॉक्टर पाSहू हा जी जी जी ||४||

अमेरिकेस सतत घाबरू | स्वाभिमान सोडू |
अफगाणी लढू | बुरखाधारीस भिSऊ हा जी जी जी ||५||

ब्लॅकबेरी शोधली जाई | कॅनडाआर्म ही |
पब्लिसिटी होई | पाच डॉलरवSरी हा जी जी जी ||६||

सेलिन् दिऑन् जन्मास येई | सिडनी क्रॉस्बीही |
संधी मिळताची | अमेरिकेस जाSई हा जी जी जी ||७||

सुंदर सुजळ सुफळ | देश दुर्बळ |
करी अमेSरिकेची | हांजी हा जी जी जी ||८||

चंद्रगीत

हिमवृष्टी होई | जग शुभ्र होई |
आसमंत उजळी | धवलरंगी ||

शुभ्र चंद्रकोर | मनी हुरहुर |
चांदणे पिठूर | धरतीही ||

शुक्राची चांदणी | मदनाची राणी |
हिमपुष्पे धाडी | गगनातून ||

हिमगौरी माझी | सोनुली गोजिरी |
शुभ्रपुष्पे पाही | झाडांवर ||

तुझे गोड हांसू | कशी मी विसरु |
वात्सल्याचे आंसू | माझ्या नयनी ||

दशदिशा तुझे | रक्षण करती |
सूर्य चंद्र तारे | नक्षत्रही ||

तुला निरखतां | जीव कां गलबले |
दु:ख पीडा सारे | क्षणी विसरले ||

चंद्रकळी माझी | निजली कां नाही |
भूक कां लागली | माझ्या बाळा ||

लुनिता गं माझी | लाडकी बाहुली |
नीज नीज आता | परी राणी ||

काळजाचा ठेका | माझा का चुकतो |
तुला सोडताना | जीव का गुंततो ||