कलाकार

त्याचं सगळं वेगळंच असतं                         त्याचं सगळं वेगळंच असतं
तो आईला काकू म्हणतो                            तो आजीला बायजी म्हणतो
काकूला मावशी म्हणतो                             बाबांना दादा म्हणतो
मावशीला ताई म्हणतो                               दादाला गोट्या म्हणतो
ताईला दीदी म्हणतो   १                             मित्राला भाऊ म्हणतो   २

त्याचं सगळं वेगळंच असतं                         त्याचं सगळं वेगळंच असतं
तो बर्फीत मीठ टाकतो                              तो सदरा उलटा घालतो
कढीत साखर टाकतो                                विजार केशरी घालतो
चहात कॉफी टाकतो                                 भांग तिरका पाडतो
नूडल्सला फोडणी देतो  ३                          चपला पांढ-या घालतो  ४

त्याचं सगळं वेगळंच असतं                         त्याचं सगळं वेगळंच असतं
तो मारुतीला दुर्वा वाहतो                            तो उपासाला पिझ्झा खातो
शंकराला कमळ वाहतो                             वाढदिवसाला फणस कापतो
गणपतीला बेल वाहतो                               तेरा बुधवारांचे व्रत करतो  
देवीला धोतरा वाहतो  ५                             बायकोला स्क्रू ड्रायव्हर भेट देतो  ६             

त्याचं सगळं वेगळंच असतं                          त्याचं सगळं वेगळंच असतं
तो जखम झाल्यावर हसतो                           तो सुखी संसार सोडून जातो
हसवल्यावर रडतो                                     पैसे मिळाल्यावर टाकून देतो   
रडल्यावर दारू पितो                                 प्रसिद्धी मिळाल्यावर गायब होतो
दारू ढोसून चित्र काढतो  ७                        गायब झाल्यावर जास्त प्रसिद्ध होतो  ८