मी जुना पुराणा

लोटले मास कितीतरी लोटली वर्षे
ना कुणी पाही मजकडे वळूनी येथे
एकटा बिचारा कंटाळून मी गेलो
पानापानांचा हिशेब ठेवीत बसलो

त्या दिनी पाहिली हुशार मुलगी एक
मन उत्सुक झाले पाहून तिला आपसूक 
परी लक्ष न देता ओलांडून ती गेली
कुठल्या डबड्यावर बटणे दाबीत बसली

वर जाता जाता धक्का लावून गेली
मम जीर्ण तनुची शकले शकले झाली
मी जुना पुराणा ग्रंथ जीर्ण पानांचा
शतकांपूर्वीचा वृद्ध नकोसा आता

कधी कुणी विदेशी छायाचित्रे काढी
जगभरात माझ्या इतिहासाची गाणी
परी आशय माझा समजेना कोणाला
मी जुना पुराणा ग्रंथ जीर्ण पानांचा