अनसर्टनटी
अनसर्टनटी डोक्यावरती
तलवार टांगते सर्टनटीने, अनसर्टनटी
अनसर्टनटी डोक्यामधले
खाते दाणे पिते पाणी
भलतीच फुगून डोक्यावरती
वाटते मिरे, हिंमत हरे, अनसर्टनटी
अनसर्टनटी जाण्यासाठी
माणूस बांधतो घरटे बिरटे
थोडे सर्टन झाले तरी
येते दुसरी अनसर्टनटी, अनसर्टनटी
अनसर्टनटी डोक्यामध्ये
करते प्रश्नांची सरबत्ती
उत्तर पुसता धूर सोडून
बनते डोक्यातली उदबत्ती, अनसर्टनटी
अन् सर्टनटी
अन् सर्टनटी पुन्हा पुन्हा
रोज रोज तेच तेच देते जगणे, ती सर्टनटी
ती सर्टनटी ज्याच्या दारी
जगणे त्याचे बोरिंग होई
ती सर्टनटी कंटाळवाळी
रोज रोज तीच तीच पोळी भाजी, ती सर्टनटी
ती सर्टनटी जगण्यामध्ये
ती सर्टनटी नोकरीमध्ये
कालच्या पाट्या पुन्हा टाकून
डोके फिरते, उबग येते, ती सर्टनटी
अनसर्टनटी अन् सर्टनटी जगण्यामध्ये
सवती सवती कटकट करती
एकीस धरता दुसरी चिडते
डोस्के धरून छळ छळ छळते,अन सर्टनटी
No comments:
Post a Comment