तो ना एकटा कधीही

ज्याची धरणी माऊली
आणि अंतराळ बाप
तो ना पोरका जगती
सारे विश्व त्याच्या घरी

सूर्य चंद्र तारकाही 
सदा साथ त्यास देती
अंध:कारी संकटात
मार्ग तयास दाविती

बंधु बांधव पहाड
वृक्षवेली गोतावळी
हर्षोत्सव प्रीती सदा
नांदे तयाच्या सदनी

शांती तयाच्या हृदयी
जसे उदक सागरी
वर लाटा बहु जरी
घनगंभीर अंतरी

असा संसार जयाचा
तो ना एकटा कधीही
सारी सृष्टी तयासाठी
असे सुखास कारणी