अशीच होती ती

अशीच होती लाघवी ती
हवीहवीशी वाटणारी
माझे खूप चुकले तरी
तिचेच चुकले मानणारी

अशीच होती साधीभोळी
पाण्यास पाणी म्हणणारी
दहा लबाड फसवून गेले
तरी न समजणारी

अशीच होती उदार ती
भरपूर काही देणारी
शंभरातले नव्वद रुपये
गरीबांना वाटणारी

अशीच होती क्षमाशील
गुपचूप सहन करणारी
अमाप दु:ख ज्याने दिले
त्याचे भले करणारी

अशीच होती आईसारखी
भरपूर माया देणारी
बदल्यात कधी तिच्यासाठी
काहीच नाही मागणारी

अशीच होती मैत्रीण माझी 
फार फार वर्षांपूर्वी
देवाला ती आवडली म्हणून
त्याच्याचकडे निघून गेली