भाग्य तुझे

घे तळहाताशी भाग्य तुझे तू हाती

जर करावयाचे काही तुज तुजसाठी

ते मूर्ख सदा जे दैवावर अवलंबून

ते दुबळे जे दैवास दोष देती अन

घे असा पवित्रा दुर्भाग्य तुझे बिचकेल

अन सुभाग्य नकळत दारी तुझ्या येईल

ते शोध गड्या जे नाही शोधिले कोणी

अन देख असे जे नाही पाहिले कोणी

जरी नसतील बांधव मायबाप वा सारे

असतील सवे ते चंद्र सूर्य अन तारे

येईल कदाचित ईश तुझ्या दारात

दे कणभर छ्द्मी हास्य त्यास पदरात