राज्य विषाणुंचे आले

राज्य विषाणुंचे आले आणि धाबे दणाणले ।।

येथे नियम वेगळे सारे सोवळे ओवळे
स्पर्श अस्पृश्यास होता सारे कसे जीवघेणे

पाळा सोवळे कडक हात धुवावे सतत
शिवाशीवीचे पालन करा संयामाने सारे

एक अदृश्य विषाणु पोखरतो फुफ्फुसांना
गोरगरीब श्रीमंत भेद नाहीच तयाला

ज्यांचे सैन्य बलाढ्य ते सारे भयभीत झाले
राष्ट्र धनिक तरीही पाणी तोंडचे पळाले

आज अचानक कसे सारे धर्म जैन झाले ?
मुखावर वस्त्र आले आणि धाबे दणाणले