उडा पाखरांनो आता

उडा पाखरांनो आता
स्थान इथे तुम्हा नाही
पंख फडफडुनी गगनी
दूर देशी जावा तुम्ही !

स्वास्थ्य इथे तुम्हा नाही
मान इथे तुम्हा नाही
मोल एका कवडीचेही
मायदेशी तुम्हा नाही

दूर देशी धरती हिरवी
मनमुराद नांदा तुम्ही
दूर देशी आभाळात
मुक्त उडा स्वच्छंदीही

दूर देशी रानामध्ये
रानमेवा खावा तुम्ही
मायदेशी धुराळ्याचे
श्वास नका ओढू तुम्ही

अन्न इथे तुम्हा नाही
पाणी इथे शुद्ध नाही
रोगराई जिथे तिथे
कर्बवायु नांदे इथे

दूरदृष्टी कोणा नाही
निर्दयता जेथे तेथे
स्वार्थ, सत्ता, संपत्तीची
हाव इथे जेथे तेथे

राज्य इथे गुंडांचे अन
कायदेही अन्यायाचे
लढा देत मायभूमी
जाल थकून इवले तुम्ही

उडा पाखरांनो आता
स्थान इथे तुम्हा नाही