कोण तुला घाई?

वाजले किती काय ठाऊक? कोंबडा आरवे कुक् कुक्
सारे कसे चिडीचूप - आई उठे गुपचूप

आई गं आई, कोण तुला घाई?
सकाळ झाली नाही अन् गाढ झोपली ताई

झुंजुमुंजु झाले नाही - पेपरवाला आला नाही
आजी अजून उठली नाही - दूधवाला आला नाही

खडखड खुडखुड वाजवतेस डबे - काय कुठे शोधतेस, मला ना कळे !
पोळीचे पीठ, की दिव्याची वात? भाजीचा माठ, की तांब्याची परात?
 
कुकर शिट्टी होते - पोळी भाजी होते
बाबा उठण्याआधीच - सारे तयार होते

आई गं आई - पुरे तुझी घाई
बाळ रडू लागला - त्याला कुशीत घे ना