नवीन गाणे

नवीन गाणे गाण्यासाठी नवा सूर लाभू दे 
त्या गाण्याला जुन्या सुरांची चाल नको लागू दे

सप्त सुरांचे ताल लयीचे कुंपण त्यास नसू दे
शास्त्राचे वा रागाचेही बंधन त्यास नसू दे

आशेच्या स्वप्नांची मंजुळ हाक ऐकू येऊ दे
त्या हाकेला साद घालण्या प्रतिभा मज लाभू दे

नवीन गाणे गाण्यासाठी नूतन शब्द स्फुरू दे
त्या शब्दांची नाजूक सुंदर कविता एक बनू दे

त्या कवितेच्या चालीवरती अंतरंग नाचू दे
हृदयामधला तरल भावही सुरांमधे उमटू दे

नसेल श्रोता कुणी तरीही गाणे ते झुळझुळू दे 
निर्जन वाटे गाता गाता नादसागरा मिळू दे