(एकता, एप्रिल २०१९ अंकात प्रकाशित)
माझ्या अल्मारीत आहे
माझ्या अल्मारीत आहे
ठेवा अमूल्य साड्यांचा
रेशमाच्या गाठोड्यात
गंध सुंदर स्मृतींचा
एक साडी मोरपिशी
मऊ मऊ नऊवारी
पेशवाई रुबाबाची
ऊब आजीच्या मायेची
पितांबरी भरजरी
माहेरच्या अहेराची
तिला पदर अंजिरी
वेलबुट्टी मखमली
पहा इंदुरी चंदेरी
दिली बाबाने प्रेमाने
तिची किनार वेगळी
बाबा, तुझी याद देई
*
आणि आता त्यात एक
भर आईच्या साडीची...
आई गेली, तिचा स्पर्श
साध्या सुती लुगड्यात
चार साड्यांचं गाठोडं
प्रेम आठवांचं धन
एक एक धाग्यासंग
देई उभारी मनास
No comments:
Post a Comment